ኢትዮ ቴሌኮም የአምስተኛው ትውልድ (5ጂ) የሞባይል አገልግሎት በዎላይታ ሶዶ፣ ሆሳዕና እና አርባምንጭ ከተሞች አስጀመረ!!

ኢትዮ ቴሌኮም ዘመኑ የደረሰባቸውን የቴክኖሎጂ ውጤቶችን ለማሕበረሰባችን ከማስተዋወቅ እና በሰፊው ተደራሽ ከማድረግ ባሻገር ሀገራችን በዲጂታል አገልግሎት በአለም አቀፍ ደረጃ  የሚኖራትን ተወዳዳሪነት ለማሳደግ የሚያስችሉ በርካታ ሥራዎችን በቁርጠኝነት በማከናወን ላይ ያለ ሲሆን፣ በአሁኑ ወቅትም የዘመናችንን አዳዲስ ቴክኖሎጂዎችንና የዲጂታል ሶሉሽኖችን በፍጥነት እያቀረበ የሀገራችንን የዲጂታል ትራንስፎርሜሽን ራዕይ ዕውን እያደረገ ይገኛል፡፡

ኩባንያችን በተለይም በከፍተኛ ሁኔታ በማደግ ላይ የሚገኘውን የደንበኞቻችንን ፍላጎት መሰረት ያደረጉ እና የደንበኛ እርካታን የሚያሳድጉ፣ የአገልግሎት ጥራትን የሚያሻሽሉ እንዲሁም ዘመኑ ያፈራቸውን አስተማማኝና ጥራት ያላቸውን አገልግሎቶች ለማቅረብ የሚያስችሉ የቴሌኮም እና ዲጂታል መሰረተ ልማቶችን በስፋትና በቁርጠኝነት በመዘርጋት ላይ ይገኛል፡፡

በዚህም መሰረት ኢትዮ ቴሌኮም በዓለም አቀፍ ደረጃ በተወሰኑ ሀገሮች ብቻ ተግባራዊ የተደረገውን የዓለማችን የቴክኖሎጂ የመጨረሻ ደረጃ የሆነውን የአምስተኛውን ትውልድ የሞባይል አገልግሎት በሀገራችን የተለያዩ ከተሞች ማለትም አዲስ አበባ፣ አዳማ፣ ጂግጂጋ፣ ድሬዳዋ፣ ሀረር፣ ባሕር ዳር፣ ሀዋሳ ከተሞች እና አካባቢያቸው ተግባራዊ አድርጓል፡፡

በዛሬው ዕለትም ኩባንያችን በደቡብ ደቡብ ምዕራብ ሪጂን ወላይታ ሶዶ፣ ሆሳዕና እና አርባምንጭ ከተሞች እና አካባቢዎቻቸው በሚገኙ የተለያዩ አካባቢዎች የ5ኛ ትውልድ የሞባይል አገልግሎት ጣቢያዎችን ገንብቶ በማጠናቀቅ የ5ኛ ትውልድ አገልግሎት በይፋ ያስጀመረ መሆኑን በታላቅ ደስታ ያበስራል፡፡ በዚህም መሰረት፡-

በወላይታ ሶዶ፡- ሶዶ ዩኒቨርሲቲ እና ኮንዶሚኒየም ሰፈር፣ ሙሉወንጌል ሰፈር ንግድ አካባቢዎችን ጨምሮ፣ የወላይታ ዞን አስተዳደር ቢሮ፣ ሀይሌ ሆቴል፣ ሶዶ ኢትዮ ቴሌኮም ቢሮ አካባቢ፣ ግብርና ኮሌጅ ሰፈር፣ ሶዶ ክርስትያን ሆስፒታል ሰፈር የንግድ አካባቢውን ጨምሮ፣ የክልሉ አስተዳደር ቢሮ እና ሌዊ ሆቴል መዝናኛ አካባቢዎች፤

በሆሳዕና፡- ሆሳዕና ማዘጋጃ፣ አራዳ፣ ቤቴል ቤተክርስቲያን፣ ዓለም አቀፍ ሆቴሎች፣ ሲቲ ሴንተር፣ የሀዲያ ባህል አዳራሽ፣ በዛብህ ጴጥሮስ አደባባይ፣ የክልሉ ፅ/ቤት፣ ጎርገዴ፣ ቤተል ሰፈር፣ እናት ቃለህይወት ቤተክርስትያን፣ መምህራን ማሰልጠኛ፣ ናሬሞ አካባቢ እና ኮንዶሚኒየም፣ ዋቸሞ ዩኒቨርሲቲ፣ አምቢቾ፣ ማሪያም ቤተክርስቲያን፣ የኢትዮጵያ ኤሌክትሪክ ኃይል፣ ሻምበል ሆቴል፣ ሞባይል ሰፈር፣ ወያዳ ኮንዶሚኒየም፣ ጎፈርሜዳ እና ሪል እስቴት አካባቢዎች እንዲሁም፤

በአርባ ምንጭ፡- አርባምንጭ ለምለም ሆቴል፣ውቤቴ ግራንድ ሆቴል፣ ሲቀላ ዳሽን ባንክ፣ ቱርሲት ሆቴል የንግድ ቦታዎችን ጨምሮ፣ አርባምንጭ ሆስፒታል፣ አርባምንጭ ዩኒቨርሲቲ፣ ጫሞ መዝናኛ፣ ሀይሌ ሆቴል እና አርባምንጭ ዩኒቨርሲቲ ዋና ግቢ አካባቢዎች የሚገኙ ደንበኞቻችን የ5ኛ ትውልድ የሞባይል ኔትወርክ ቴክኖሎጂ ትሩፋት ተጠቃሚ መሆን ይችላሉ፡፡

የ5ኛው ትውልድ ቴክኖሎጂ እስከ 10 ጊ.ባ በሰከንድ (Gbs) የሚደርስ ከፍተኛ ፍጥነት ያለው ዓለማችን የደረሰበት ዘመናዊ የገመድ አልባ ኔትወርክ ቴክኖሎጂ ሲሆን፣ ዳታ የማስተላለፍ መዘግየትን እጅግ በላቀ ሁኔታ በመቀነስ (Ultra-low latency) ረገድ ወደ 1ሚሊ ሰከንድ የሚያደርስ ቴክኖሎጂ ነው፡፡ አገልግሎቱ በአንድ ካሬ ኪሎ ሜትር ውስጥ እስከ 1 ሚሊዮን የሚደርሱ በርካታ የቴክኖሎጂ መሳሪያዎችን እርስ በርሳቸው ለማገናኘት የሚያስችል ሲሆን፣ የአገልግሎቱ ተግባራዊ መሆን በከፍተኛ ሁኔታ እያደገ የመጣውን የደንበኞች የዳታ እና ኢንተርኔት ፍላጎት ለማርካት የሚያስችል አቅም ይፈጥራል፡፡

የኩባንያችን የ5ኛው ትውልድ ኔትወርክ ተግባራዊ ማድረግ የኔትዎርክ መጨናነቅን በእጅጉ በመቀነስ ደንበኞች ጥራት ያለውና ፈጣን የኮሙኒኬሽን፣ ዲጂታል ሶሉሽኖች እና ዲጂታል ፋይናንስ አገልግሎት ተጠቃሚ በመሆን ህይወታቸውን እንዲያቀሉ ከማስቻል ባሻገር የኦንላይን ትምህርት፣ ስልጠና፣ መረጃ እና የመዝናኛ አገልግሎት አቅርቦት እንዲሁም የይዘት ፈጠራ (content creation)፣ ለጀማሪ የሶፍትዌር አበልጻጊዎች ኢኖቬሽን እና የሥራ ፈጠራን በማበረታታት የኢኮኖሚ ተጠቃሚነትን ያሳድጋል፡፡ እንዲሁም የስማርት ስልክ ስርጸትን ለመጨመር መደላድል በመፍጠር የዲጂታል ሊትሬሲን በማሳደግ እና የዲጂታል ክፍተትን (digital-divide) በማጥበብ አካታች የዲጂታል ኢኮኖሚን ለመገንባት አስቻይ ሁኔታ ይፈጥራል፡፡

ኢትዮ ቴሌኮም 5ጂ ኔትወርክን የሚያስፋፋው ለስማርት የጤና አገልግሎት እና ለሆስፒታል አስተዳደር፣ ለስማርት ግብርና፣ ለስማርት ትምህርት፣ ለስማርት ማዕድን፣ ለስማርት ማኑፋክቸሪንግ፣ ለስማርት ኤርፖርትና የጉዞ አገልግሎት፣ ለስማርት ትራንስፖርት፣ ለዘመናዊ የመኖሪያ ቤት (Smart home)፣ ለብሮድካስቲንግና ለመዝናኛ፣ ጌምን ጨምሮ በክላውድ ላይ ለተመሰረቱ የዲጂታል አገልግሎቶች እንዲሁም የሰው ሰራሽ አስተውሎት ትሩፋቶች ለመጠቀም የሚያስችል ዘመናዊ የመሰረተ ልማት አቅም ለመፍጠር በማለም ነው፡፡

አገልግሎቱ ኩባንያችንን ወደ ዘመናዊ የቴሌኮም መሰረተ ልማት ከማሸጋገር ባሻገር የቢዝነስ እና ተቋማት አሠራር በማዘመን ቅልጥፍና ለማምጣት፣ ምርታማነትን በመጨመር ገቢን ለማሳደግ፣ ብክነትን በመቀነስ ትርፋማነት ለማሳደግ፣ ምርትና አገልግሎትን በተመጣጣኝ ዋጋ ለማቅረብ እንዲሁም መረጃን መሰረት ያደረገ (data-driven) ውሳኔ ለመስጠት በማስቻል እንዲሁም አስተማማኝ እና ለተልዕኮ-ወሳኝ የሆነ (mission critical) ቀጥተኛ (real time) የዳታ ፍሰትን በማረጋገጥ ተወዳዳሪነትን ለመጨመር እና ለሀገራችን የዲጂታል ኢኮኖሚ ግንባታ ከፍተኛ ፋይዳ ይኖረዋል፡፡

ክቡራን ደንበኞች ኩባንያችን ይፋ ባደረገው ፈጣን የ5ጂ ኔትወርክ አማካኝነት ያልተገደበ ዳታ፣ የመደበኛ መኖሪያ ቤት አገልግሎት እንዲሁም የተለያዩ የ5ጂ ጥቅል አማራጮችን መጠቀም የሚችሉ ሲሆን፣ አገልግሎቱን ለመጠቀም የሚያስችሉ የቴሌኮም መሳሪያዎችና ቀፎዎች ሊኖራቸው ይገባል፡፡

ጥቅምት 23 ቀን 2017 ዓ.ም

ኢትዮ ቴሌኮም